Ethiopian Energy^Power Business Portal

(ethiopianreporter/ታምሩ ጽጌ, 22 April 2018)

 

የረጲ ደረቅ ቆሻሻ ኃይል ማመንጫ ግንባታ መጠናቀቁ ተጠቆመ

      Photo: thereporterethiopia

በ120 ሚሊዮን ዶላር ወጪ ከሦስት ዓመታት በፊት የተጀመረው የረጲ ደረቅ ቆሻሻ ኃይል ማመንጫ፣ ግንባታው መጠናቀቁንና በሰኔ ወር አገልግሎት መስጠት እንደሚጀምር ተገለጸ፡፡ የኢትዮጵያ ኤሌክትሪክ ኃይል ዋና ሥራ አስፈጻሚ ወ/ሮ አዜብ አስናቀ (ኢንጂነር) እንደተናገሩት፣ ረጲ ደረቅ ቆሻሻ ኃይል ማመንጫ በ37 ሔክታር መሬት ላይ ያረፈ ፕሮጀክት ነው፡፡ ፕሮጀክቱ ከከተማው በየቀኑ ከሚወጣው 1,400 ቶን ቆሻሻ 50 ሜጋ ዋት ኃይል ለማመንጨት ታስቦ የተጀመረ መሆኑን፣ በአሁኑ ጊዜ ግንባታው ሙሉ ለሙሉ ተጠናቋል በሚባል ሁኔታ ላይ ስለሆነ፣ በሰኔ ወር 2010 ዓ.ም. አገልግሎት እንደሚሰጥ አስታውቀዋል፡፡ በኮልፌ ቀራኒዮ ክፍለ ከተማ ወረዳ አንድ ክልል ውስጥ የሚገኘው የረጲ ደረቅ ቆሻሻ የኃይል ማመንጫ ፕሮጀክት፣ በአጭር ጊዜ እንደሚጠናቀቅ የፕሮጀክቱ ሥራ ሲጀመር የተገለጸ ቢሆንም፣ ከኮንትራክተሩ ጋር በተፈጠረ አለመግባባት ሊዘገይ መቻሉን አስረድተዋል፡፡ በተጨማሪም ከፕሮጀክቱ የሚገኘውን ኃይል ወደ ብሔራዊ የኤሌክትሪክ ቋት ለመውሰድ የማስተላለፊያ መስመሮች የሚያልፉባቸው ቤቶችንና ንብረቶችን ለማስነሳትም ረዥም ጊዜ መውሰዱን አክለዋል፡፡

የፕሮጀክቱ ግንባታ ተጠናቆ የሙከራ ጊዜ መጀመሩን ጠቁመው፣ የዘንድሮ በጀት ዓመት ከመጠናቀቁ በፊት ሙሉ በሙሉ ሥራ ለማስጀመር መርሐ ግብር ወጥቶ እየተሠራ መሆኑን አስረድተዋል፡፡ ፕሮጀክቱ በአፍሪካ የመጀመርያ መሆኑንና አገልግሎት መስጠት ሲጀምር ከአዲስ አበባ ከተማ ነዋሪዎችና ከተለያዩ የንግድ ተቋማት የሚወገዱ ቆሻሻዎችን፣ ወደ ኃይል በመቀየር ተደራራቢ ጥቅም እንደሚሰጥ ወ/ሮ አዜብ ገልጸዋል፡፡

የፕሮጀክቱ ግንባታ ተቀማጭነቱ እንግሊዝ በሆነው ካምብሪጅ ኢንዱስትሪስ እየተከናወነ መሆኑን መዘገባችን ይታወሳል፡፡ የረጲ ደረቅ ቆሻሻን በመጠቀም የኤሌክትሪክ ኃይል ለማመንጨት፣ የአዲስ አበባ ከተማ አስተዳደር ከኢትዮጵያ ኤሌክትሪክ ኃይል ጋር በትብብር እንደሚሠራ አይዘነጋም፡፡    

0
0
0
s2smodern

Add comment


Security code
Refresh